Kif naħdmu

Bħall-Membri tal-Parlament Ewropew kollha, il-Membri tal-Grupp tal-PPE jiġu eletti fil-livell lokali mill-votanti fl-Istat Membru tagħhom biex jirrappreżentaw l-interessi tal-popolazzjoni lokali fuq kwistjonijiet leġiżlattivi u politiċi fil-livell Ewropew, iggwidati mill-pożizzjoni ġenerali tal-Grupp tagħhom.

Il-Membri tal-Parlament Ewropew huma organizzati skont l-affiljazzjoni politika, mhux skont il-pajjiż, u jistgħu jagħmlu parti minn grupp politiku wieħed biss. Il-Grupp tal-PPE huwa l-akbar fost it-tmien gruppi politiċi tal-Parlament Ewropew.

L-attività ewlenija tal-Grupp tal-PPE fil-Parlament Ewropew (PE) hija l-ħidma leġiżlattiva. Il-PE jagħmel il-biċċa l-kbira ta’ xogħlu permezz ta’ kumitati speċjalizzati, li jfasslu, jemendaw u jadottaw proposti leġiżlattivi u rapporti. Il-Membri tagħna huma rrappreżentati f’dawn il-kumitati parlamentari, u fihom jokkupaw ħafna pożizzjonijiet ta’ tmexxija fi proporzjon mad-daqs tal-Grupp tagħna.

Il-gruppi ta’ ħidma tagħna

Is-suġġetti koperti mill-kumitati tal-PE huma vasti u varjati. Biex dan ikun rifless, norganizzaw xogħolna fil-kumitati skont gruppi ta’ ħidma. L-erba’ gruppi ta’ ħidma tagħna, kull wieħed minnhom immexxi minn wieħed mill-Viċi Presidenti tagħna, jirrappreżentaw l-oqsma politiċi prijoritarji tagħna:

• l-ekonomija, l-impjiegi u l-ambjent
• l-intern u l-affarijiet legali
• il-baġit, l-agrikoltura u l-fondi reġjonali
• l-affarijiet barranin

Dawn il-gruppi ta’ ħidma jifformulaw il-pożizzjoni kkoordinata fil-livell għoli tal-Grupp tal-PPE fir-rigward tar-rapporti u tar-riżoluzzjonijiet li l-PE jkun se jivvota fuqhom fil-livell tal-kumitait parlamentari u tal-plenarja.

Il-Grupp tal-PPE l-ewwel iħejji l-pożizzjoni tal-PPE fil-livell ta’ kumitat. Il-gruppi ta’ ħidma mbagħad jiltaqgħu qabel kull sessjoni plenarja. F’dawn il-laqgħat il-Membri tagħna jiddiskutu r-rapporti, ir-riżoluzjonijiet u l-punti l-oħra li jidħlu fis-setturi politiċi speċifiċi tagħhom bil-għan li tissawwar linja komuni tal-Grupp tal-PPE li tiġi segwita waqt il-votazzjonijiet li jsiru fis-sessjoni plenarja tal-PE li jkun imiss.

Bħala l-akbar grupp politiku tal-Parlament, ninsabu f’pożizzjoni aktar b’saħħitha meta mqabbla ma’ dik ta’ gruppi oħrajn, mhux biss meta niffissaw l-aġenda politika iżda wkoll meta niġu biex nirbħu l-votazzjonijiet l-aktar importanti. Infatti, mill-1999, irbaħna aktar votazzjonijiet minn kwalunkwe grupp ieħor fis-sessjonijiet plenarji ta’ kull xahar tal-PE.

Fi ħdan il-Partit Popolari Ewropew

Il-Partit Popolari Ewropew (PPE) huwa l-akbar familja politika fl-UE u dik l-aktar influwenti. L-attività ewlenija tiegħu tikkonsisti f’li jifformula pjattaformi politiċi fit-tul, jagħmilha ta’ punt fokali ta’ kuntatt għall-politiċi taċ-ċentru lemin Ewropew, u jaġixxi ta’ ankra politika għall-partiti tal-pajjiżi Ewropej mhux membri tal-UE. Il-PPE jorganizza regolarment kungressi li matulhom ir-rappreżentanti tal-partiti membri, tal-gvernijiet nazzjonali u tal-organizzazzjonijiet fi ħdan il-familja tal-PPE, pereżempju l-Grupp tal-PPE, jiltaqgħu biex jiddiskutu dwar il-programm politiku u jiddeterminaw id-direzzjoni politika tal-PPE.

Barra minn hekk, il-Kapijiet ta’ Stat u ta’ Gvern tal-UE li jappartjenu għall-PPE jiltaqgħu qabel kull Kunsill Ewropew biex jiddiskutu l-aġenda tal-Kunsill Ewropew u jikkoordinaw il-pożizzjonijiet politiċi. Dawn is-Summits tal-PPE, kif insejħulhom, jirrappreżentaw opportunità għalina biex niddiskutu dwar kwistjonijiet ta’ attwalità mal-kontropartijiet Ewropej tagħna.

Il-Grupp tal-PPE jlaqqa’ lil dawk ir-rappreżentanti tal-PPE li ġew eletti Membri tal-Parlament Ewropew. Il-Grupp huwa rappreżentat f’kull korp ewlieni tal-Partit: il-Kungress, l-Assemblea Politika u l-Presidenza.