Sigurtà u Difiża

Għal stabbiltà fil-viċinanzi tal-UE

Il-Kumitat għas-Sigurtà u d-Difiża (SEDE) huwa responsabbli mis-superviżjoni tal-politika ta’ sigurtà u difiża komuni (PSDK) u minn miżuri tal-Unjoni Ewropea li jikkonċernaw esklussivament id-difiża. Il-Kumitat għandu rwol fundamentali fit-tiswir u l-implimentazzjoni ta’ strateġija ta’ difiża tal-UE, kapaċitajiet militari u sħubijiet globali fil-qasam tas-sigurtà, u jaħdem għal politika ta’ difiża Ewropea aktar awtonoma u integrata.

L-oqsma prinċipali ta’ azzjoni jinkludu, fost oħrajn:

• il-monitoraġġ tat-theddid għall-integrità territorjali tal-UE u l-Istati Membri tagħha, kif ukoll tar-riskji għaċ-ċittadini tal-UE;
• ir-revalwazzjoni u implimentazzjoni ta’ deċiżjonijiet u politiki strateġiċi fil-qasam tad-difiża;
• il-ġlieda kontra t-theddid ibridu, b’mod partikolari fil-qasam taċ-ċibersigurtà, ta’ manipulazzjoni minn atturi barranin u ta’ protezzjoni tal-infrastruttura kritika;
• it-titjib tal-infrastrutturi u tal-mobbiltà militari biex jissaħħu t-tħejjijiet u jipprovdu protezzjoni għal theddid minn atturi barranin.

Barra minn hekk, f’kollaborazzjoni mal-Kumitat għall-Affarijiet Barranin, il-Kumitat SEDE għandu rwol kruċjali fil-kwistjonijiet relatati mal-politika estera u ta’ sigurtà komuni (PESK) u mal-politika ta’ sigurtà u ta’ difiża komuni (PSDK).

Nippromovu Unjoni Ewropea tad-Difiża aktar b’saħħitha

Il-Grupp tal-PPE jibqa’ impenjat li jsaħħaħ is-sigurtà taċ-ċittadini Ewropej billi jippromwovi aktar kooperazzjoni u koordinament fost l-Istati Membri tal-UE dwar kwistjonijiet ta’ difiża. Wasal il-mument li l-Ewropa tieħu r-riedni tas-sigurtà tagħha f’idejha, u ssir kapaċi u disposta tiddefendi lilha nnifisha u l-interessi tagħha.

Jeħtiġilna nagħmlu b’urġenza reviżjoni sistematika tad-difiża Ewropea. Il-Grupp tal-PPE ilu ħafna jsostni fuq il-ħolqien ta’ Unjoni Ewropea tad-Difiża li fiha l-Istati Membri jkunu jistgħu jallinejaw ruħhom strateġikament u jifhmu t-theddid flimkien.

Il-Grupp tal-PPE jinsisti fuq il-fatt li l-UE u l-Istati Membri tagħha jridu jżidu l-kapaċitajiet ta’ difiża tagħhom u jieħdu miżuri konkreti għal Unjoni ta’ Difiża awtentika. Nappoġġjaw:

• suq wieħed Ewropew fuq difiża li jinvesti f’teknoloġiji tad-difiża next generation;
• it-tisħiħ ta’ kooperazzjoni u integrazzjoni ta’ kapaċitajiet tad-difiża Ewropej.

Għal dan l-għan, żviluppajna pjan għal kif għandha taħdem l-Unjoni tad-Difiża u qed inkomplu ninsistu fuq pjan direzzjonali realistiku u prattiku biex din tinħoloq.