'Iċċekkja l-affarijiet sew qabel titkellem dwar il-ħidma tagħna fl-Ewropa'

L-Ewroparlamentari tal-PN David Casa u Peter Agius lill-Prim Ministru Robert Abela

Il-Kap tad-Delegazzjoni tal-Partit Nazzjonalista fil-Parlament Ewropew, David Casa, u l-Ewroparlamentari tal-PN Peter Agius illum ċaħdu l-allegazzjoni tal-Prim Ministru Robert Abela li s-sejħiet tagħhom għall-ġustizzja u għar-restawr tas-saltna tad-dritt f’Malta huma tentattiv biex ifixklu n-negozjati dwar il-baġit fit-tul li jmiss tal-Unjoni Ewropea. Abela għamel din l-allegazzjoni fil-Parlament ilbieraħ.

“Int m’intix Malta, Prim Ministru. Ieqaf ħallat l-interessi personali tiegħek ma’ dawk tal-poplu Malti u Għawdxi li aħna ġejna eletti biex niddefendu. Fejn jidħlu l-fondi Ewropej, it-track record tiegħi jitkellem waħdu. Jiena dejjem żgurajt li l-poplu Malti u Għawdxi jikseb dak li ħaqqu u għal darb’oħra ninsab fuq il-mejda tan-negozjati għall-Fond Soċjali Ewropew li jmiss. Li takkużana li qed nippruvaw infixklu dawn in-negozjati huwa kliem għalkollox bla sens,” qal Casa.

Casa nnegozja l-Fond Soċjali Ewropew Plus attwali, li mmobilizza aktar minn €200 miljun f’finanzjament għal Malta. Dan il-fond jgħin lin-nies f’Malta u Għawdex isibu impjieg u lin-negozji jħarrġu lill-ħaddiema tagħhom. Fin-negozjati dwar il-Fond Soċjali għall-Klima, huwa kiseb għal Malta għaxar darbiet l-ammont oriġinarjament propost, biex jgħin lill-familji u lin-negozji ż-żgħar bl-ispejjeż tal-enerġija u t-trasport. Casa bħalissa qed imexxi n-negozjati dwar il-Fond Soċjali Ewropew għall-baġit li jmiss tal-UE.

Min-naħa tiegħu, l-Ewroparlamentari Peter Agius ressaq emendi għal ħames regolamenti Ewropej bil-għan li Malta u Għawdex jiksbu aktar fondi: għat-trasport, inkluż għal proġett ta’ metro f’Malta; għal kapitlu ddedikat għal Għawdex fil-programmi nazzjonali u reġjonali; għall-films Maltin permezz ta’ AgoraEU u Ewropa Kreattiva; u għal aktar opportunitajiet u appoġġ finanzjarju għall-parteċipanti Maltin fil-programm Erasmus. Ippropona wkoll bidliet fir-regoli tal-ETS għat-trasport marittimu u l-avjazzjoni, kif ukoll użu aħjar tal-fondi għall-innovazzjoni. Permezz ta’ avvenimenti f’Malta u l-ħidma tiegħu fil-livell Ewropew, insista fuq aktar fondi biex titjieb il-konnettività ta’ Għawdex, inkluż għal vapuri ġodda.

Agius ħadem ukoll biex l-impriżi Maltin ikollhom aċċess aħjar għall-fondi Ewropej għar-riċerka. F’laqgħat mal-Kummissarju responsabbli mir-riċerka, Ekaterina Zaharieva, talab li jitwessgħu l-kriterji għall-aċċess għal dawn il-fondi, biex aktar impriżi Maltin ikunu jistgħu jibbenefikaw minnhom.

“Il-fatti jikkontradixxu b’mod ċar lill-Prim Ministru. Il-Prim Ministru għandu jkun jaf aħjar. Li naħdmu fl-interess nazzjonali jitlob, qabel kollox, li nkunu onesti f’dak li ngħidu. Aħna se nkomplu naħdmu favur il-familji Maltin, għax wara kollox in-nies jafu tajjeb li Malta mhijiex il-Prim Ministru u l-Prim Ministru mhuwiex Malta,” temm jgħid l-Ewroparlamentari Agius.