Casa jilqa’ l-approvazzjoni ta’ €60.6 miljun għal Malta taħt il-Pjan Soċjali għall-Klima

Il-Fond innegozjat minn David Casa se jiffinanzja djar aktar effiċjenti fl-enerġija, kontijiet tal-enerġija aktar baxxi u trasport aħjar għal persuni vulnerabbli

Il-Kummissjoni Ewropea approvat il-Pjan Soċjali għall-Klima ta’ Malta, li se jwassal għal investiment totali ta’ €60.6 miljun bejn l-2026 u l-2032 biex jappoġġja familji vulnerabbli, utenti tat-trasport u negozji żgħar fit-tranżizzjoni klimatika.
Il-pjan se jibbenefika minn €45.4 miljun f’finanzjament mill-UE permezz tal-Fond Soċjali għall-Klima, li ġie nnegozjat mill-Kap tad-Delegazzjoni tal-PN fil-Parlament Ewropew, l-MEP David Casa, wieħed min-negozjaturi ewlenin tal-Parlament Ewropew dwar din il-leġiżlazzjoni, flimkien mal-MEP Olandiża tal-EPP Esther de Lange. It-tnejn mexxew in-negozjati f’isem il-Parlament Ewropew.
“Dan huwa pass importanti għal Malta u riżultat konkret ta’ snin ta’ ħidma biex niżguraw li l-politika klimatika ttejjeb il-ħajja tan-nies, flok toħloq piżijiet ġodda fuq dawk li l-inqas jistgħu jifilħuhom,” qal Casa.
“Il-Fond Soċjali għall-Klima nħoloq biex ikun il-mekkaniżmu ta’ protezzjoni soċjali fit-tranżizzjoni klimatika tal-Ewropa. L-għan tiegħu huwa ċar: inaqqas il-kontijiet tal-enerġija, jindirizza l-faqar enerġetiku u dak relatat mat-trasport, u jgħin lill-familji vulnerabbli u lill-intrapriżi ż-żgħar jitbiegħdu mill-fjuwils fossili għaljin.”
Il-pjan ta’ Malta jinkludi investimenti biex tittejjeb l-effiċjenza fl-użu tal-enerġija u biex jiġu installati sistemi ta’ enerġija rinnovabbli f’akkomodazzjoni soċjali pubblika, fosthom insulazzjoni tas-soqfa, pannelli fotovoltajċi, sistemi ta’ ħażna tal-enerġija bil-batteriji u ħiters tal-ilma b’pompi tas-sħana. Se jipprovdi wkoll servizz ta’ trasport komunitarju bieb bieb għal aktar minn 30,000 persuna vulnerabbli u jgħin lil mikrointrapriżi vulnerabbli jaqilbu għal vetturi elettriċi u jinstallaw infrastruttura għall-iċċarġjar tagħhom.
Casa fakkar li l-ftehim finali dwar il-Fond Soċjali għall-Klima assigura lil Malta allokazzjoni sostanzjalment akbar minn dik li kienet oriġinarjament prevista.
“Meta nnegozjajna din il-leġiżlazzjoni, ħdimt biex is-sehem ta’ Malta jiżdied b’mod sinifikanti. Illum, aktar minn €60 miljun qed jiġu mobilizzati għall-benefiċċju taċ-ċittadini Maltin u Għawdxin bħala riżultat ta’ din il-ħidma,” qal Casa.
“L-investimenti li issa ġew approvati jirriflettu dak li ridna niksbu: aktar enerġija rinnovabbli, djar b’insulazzjoni aħjar, trasport aktar nadif u tfaddil fit-tul għaċ-ċittadini.”
Casa saħaq li l-approvazzjoni tal-pjan issa trid tkun segwita minn implimentazzjoni f’waqtha u b’mod trasparenti.
“L-approvazzjoni ma tistax tkun it-tmiem tal-proċess. Il-Gvern għandu jiżgura li dawn il-fondi jaslu għand dawk li verament għandhom bżonnhom mingħajr dewmien bla bżonn. L-implimentazzjoni trid tkun trasparenti, immirata sew u soġġetta għal skrutinju rigoruż,” qal Casa.
“It-tranżizzjoni ekoloġika tista’ tirnexxi biss jekk tkun ukoll tranżizzjoni soċjalment ġusta. Ħadd m’għandu jitħalla lura, u Malta issa trid tittraduċi din l-opportunità f’inqas spejjeż, servizzi aħjar u kundizzjonijiet ta’ għajxien aħjar għal eluf ta’ familji.”