Casa jikseb appoġġ għal Fond Soċjali Ewropew aktar b’saħħtu

Il-Kumitat għall-Impjiegi u l-Affarijiet Soċjali tal-Parlament Ewropew illum approva pakkett ta' proposti mmexxija mill-Kap tad-Delegazzjoni tal-PN fil-Parlament Ewropew, David Casa, u l-ko-rapporteur Marit Maij, biex jissaħħaħ il-Fond Soċjali Ewropew.

Dan il-vot huwa pass importanti biex jiġi żgurat li, fil-baġit li jmiss tal-UE, jibqa’ jitħares l-investiment Ewropew fl-impjiegi, fit-taħriġ u fl-għajnuna soċjali.

“Dan il-fond huwa dwar in-nies. Jgħin lill-ħaddiema jiksbu ħiliet ġodda, liż-żgħażagħ isibu opportunitajiet u lill-familji jingħataw l-għajnuna meta l-aktar ikollhom bżonnha. Il-vot tal-lum jagħtina bażi soda biex niddefendu dan l-investiment fin-negozjati li ġejjin,” qal Casa.

Casa ħadem biex il-fond jibqa’ ffukat fuq l-għanijiet soċjali ewlenin tiegħu, b’finanzjament stabbli u prijoritajiet ċari. Huwa insista fuq Fond Soċjali Ewropew b’saħħtu u distint, li jkompli jgħin fil-ħolqien tal-impjiegi u fil-ġlieda kontra l-faqar u l-esklużjoni soċjali.

“L-investiment fin-nies irid jibqa’ prijorità Ewropea. L-organizzazzjonijiet li jipprovdu taħriġ, servizzi marbuta mal-impjiegi u għajnuna fil-komunitajiet tagħna għandhom bżonn iċ-ċertezza. U dawk li jiddependu fuq dawn is-servizzi jistħoqqilhom din iċ-ċertezza.”

Casa laqa’ wkoll il-fatt li l-inizjattiva “My Voice, My Choice” tħalliet barra mit-test approvat mill-Kumitat.

“Irnexxielna nżommu ‘My Voice, My Choice’ barra minn dan it-test. L-attenzjoni tagħna tibqa’ fuq it-tisħiħ tal-Fond Soċjali u fuq it-twettiq tal-għanijiet ewlenin tiegħu: il-ħaddiema, iż-żgħażagħ, il-familji u t-tfal.”

Il-proposti tfasslu wara konsultazzjonijiet mal-imsieħba soċjali, mas-soċjetà ċivili u ma’ organizzazzjonijiet li jmexxu programmi ffinanzjati mill-UE, fosthom dawk f’Malta u Għawdex.

Casa, li kien ukoll ir-rapporteur għar-regolament attwali tal-Fond Soċjali Ewropew Plus, qal li se jkompli jaħdem biex dawn il-prijoritajiet jibqgħu jitħarsu hekk kif javvanzaw in-negozjati.

“Illum għamilna pass importanti ’l quddiem. Se nkompli naħdem għal fond li joħloq opportunitajiet u jgħin lil dawk li l-aktar għandhom bżonn l-għajnuna.”