Casa jospita konferenza nazzjonali dwar il-futur tal-Fond Soċjali Ewropew

Stakeholders kellhom iċ-ċans isemmgħu leħinhom il-Ġimgħa waqt konferenza dwar il-Fond Soċjali Ewropew (FSE), organizzata mill-MPE David Casa (PPE), il-ko-rapporteur tal-Parlament Ewropew dwar l-istess fajl.

Il-konferenza laqqgħet flimkien mexxejja politiċi Maltin u Ewropej, dawk li jfasslu l-politika, imsieħba soċjali u prattikanti ewlenin, u inkludiet interventi mill-President tal-Parlament Ewropew Roberta Metsola, il-kap tal-PN Alex Borg, il-Ministru għall-Fondi tal-UE Stefan Zrinzo Azzopardi, il-President Emeritus Marie-Louise Coleiro Preca, il-ko-rapporteur Marit Maij, u partijiet interessati ewlenin f'Malta.

Filwaqt li laqa' lill-mistednin, Casa enfasizza l-importanza tal-FSE bħala l-għodda primarja tal-Unjoni Ewropea għall-investiment fin-nies, u fl-istess ħin saħaq li l-fond għandu jibqa' strument awtonomu.

“Kulħadd jista' jibbenefika minn dan il-fond - studenti, ħaddiema, persuni b'diżabilità, dawk l-aktar fil-bżonn, u anke l-impjegaturi. Ejjew inkomplu naħdmu flimkien biex insaħħuh u ntejbuh,” qal Casa.

Il-kap tal-PN Alex Borg saħaq fuq l-importanza li Malta jkollha rappreżentanza b'saħħitha fl-Ewropa minn nies li jifhmu r-realtajiet tal-pajjiż u li huma kapaċi jinfluwenzaw it-teħid tad-deċiżjonijiet fl-ogħla livelli.

Huwa qal li r-rwol ċentrali ta' David Casa fin-negozjati dwar il-futur tal-fond jiżgura li l-interessi ta' Malta jkunu salvagwardjati, u żied li dan ix-xogħol kien jeħtieġ li jkompli biex ikun żgurat li l-fondi tal-UE jsiru aktar effettivi, iffukati u mmirati lejn dawk li għandhom l-aktar bżonnhom.

“Nafu li l-isfidi huma sinifikanti. Iżda jiena nagħżel li nara dawn bħala opportunitajiet, u jien inkoraġġut mix-xogħol tal-għaġeb li l-organizzazzjonijiet qed jagħmlu kuljum biex itejbu l-ħajjiet tan-nies. Ejjew inkomplu nindirizzaw l-għoli tal-ħajja, ejjew inkomplu nappoġġjaw liż-żgħażagħ fil-bini tal-futur tagħhom, ejjew niżguraw li ħadd ma jirriskja li jitħalla lura,” qal Borg.

Il-President Metsola saħqet fuq il-ħtieġa li l-fond ikun ippreparat għal realtajiet ġodda billi jinħolqu aktar opportunitajiet u jkun żgurat li ħadd ma jitħalla lura.

Hija qalet li l-komunitajiet dejjem kienu fiċ-ċentru tad-deċiżjonijiet tal-Parlament Ewropew u l-FSE jirrappreżenta l-isforz kontinwu meħtieġ biex is-soċjetà tkompli tagħmel progress.

Il-President Emeritus Marie-Louise Coleiro Preca nnotat li wara kull politika kien hemm nies li ħajjithom setgħet tinbidel u li l-FSE diġà kien qed jagħmel differenza konkreta.

“Għandna bżonn mira preċiża. Programmi ġeneriċi mhumiex biżżejjed. Is-servizzi jridu jkunu integrati,” hija saħqet, fejn żiedet li kien hemm bżonn ukoll għodod ta' kejl xierqa biex jiġi meqjus l-impatt tal-miżuri li qed jiġu implimentati.

Zrinzo Azzopardi qal li s-suċċessi tal-passat għandhom iservu bħala pedament għall-progress fil-futur. Huwa saħaq fuq il-ħtieġa ta' flessibbiltà akbar f'kif jiġu investiti l-fondi u qal li l-isfidi marbuta mad-demografija u l-insularità kienu jeħtieġu jiġu indirizzati wkoll.

Il-konferenza kienet indirizzata wkoll mid-Deputat Ivan Bartolo, id-direttur tal-Caritas Anthony Gatt, il-president tal-Kunsill Reġjonali t'Għawdex Samuel Azzopardi, talent development manager f'Farsons Rosette Thake, l-evalwatur u direttur tal-fondi tal-UE tal-MFA Peter Busuttil, l-istudenta universitarja Ella Micallef Darmenia, ir-rappreżentanta tal-Caritas Malta Marica Cassar, il-Kap Eżekuttiv ta' Inspire Antonello Gauci, u s-segretarju eżekuttiv tal-Assoċjazzjoni tal-Kunsilli Lokali Leanne Cassar.

Aktar kmieni din il-ġimgħa, Casa u Maij ippreżentaw l-abbozz ta' rapport tagħhom lill-Kumitat għall-Impjiegi u l-Affarijiet Soċjali tal-Parlament Ewropew, fejn talbu għal Fond Soċjali Ewropew aktar b'saħħtu u indipendenti b'investiment garantit għall-komunitajiet l-aktar vulnerabbli tal-Ewropa.

Ir-rapport issa se jiġi eżaminat mill-membri tal-kumitat, u wara jitressqu emendi hekk kif ikomplu n-negozjati.