Peter Agius jappella għal test obbligatorju tal-impatt fuq il-gżejjer f'liġijiet ġodda tal-UE

Esperti jappoġġjaw il-proposta u jwissu li l-ispejjeż għoljin tat-trasport u l-insularità qed ipoġġu lin-negozji u lill-konsumaturi li jgħixu fi gżejjer fi żvantaġġ

Il-Kumitat għas-Suq Intern u l-Ħarsien tal-Konsumatur (IMCO) tal-Parlament Ewropew illum iddiskuta l-isfidi li jiffaċċjaw il-gżejjer tal-Unjoni Ewropea, fuq inizjattiva tal-Membru Parlamentari Ewropew Peter Agius. Fid-dibattitu ħadu sehem il-Ministru Clint Camilleri, l-ekonomista Marisa Xuereb, rappreżentanti tal-Kummissjoni Ewropea u diversi Membri Parlamentari Ewropej, fosthom Alex Agius Saliba.

Din id-diskussjoni saret wara li l-Kummissjoni Ewropea ppreżentat l-Istrateġija tagħha għall-Gżejjer f'Lulju li għadda, u qabel ma l-Parlament Ewropew jadotta l-pożizzjoni tiegħu dwar kif il-gżejjer tal-UE jistgħu jgawdu aktar bis-sħiħ mill-benefiċċji tas-sħubija fl-Unjoni Ewropea.

Il-Ministru Camilleri saħaq fuq il-ħtieġa li l-UE tevalwa aħjar kif politiki ġodda jaffettwaw l-ispejjeż għan-negozji u l-konsumaturi. Marisa Xuereb wissiet li l-ispejjeż tat-trasport qed "bil-mod il-mod idgħajfu l-industrija tal-manifattura Maltija", filwaqt li rrimarkat li paragun tal-prezzijiet għall-konsumaturi fil-Ġermanja u f'Malta juri li l-prezzijiet f'Malta huma madwar 30% ogħla.

Xuereb irrimarkat ukoll li Malta timporta madwar 80% tal-ikel li teħtieġ, u dan jagħmel lill-pajjiż partikolarment vulnerabbli għall-ispejjeż u r-riskji marbuta mal-ktajjen internazzjonali tal-provvista.

Il-Membru Parlamentari Ewropew Agius appella biex kull proposta leġiżlattiva ġdida tal-UE tkun tinkludi valutazzjoni speċifika tal-impatt fuq il-gżejjer. Din għandha teżamina kif il-liġijiet jaffettwaw l-ekonomiji tal-gżejjer u tidentifika l-miżuri meħtieġa biex jitħarsu l-interessi tagħhom, fosthom derogi jew kundizzjonijiet speċjali fil-leġiżlazzjoni nnifisha.

Huwa rringrazzja lill-Kumitat talli laqa' l-inizjattiva tiegħu, filwaqt li saħaq li, għalkemm l-approċċ tal-Kummissjoni juri li qed tifhem l-isfidi li jiffaċċjaw il-gżejjer, għadu ma joffrix soluzzjoni sistematika għalihom.

Kemm il-Ministru Camilleri kif ukoll Xuereb esprimew l-appoġġ tagħhom għal din il-proposta. Xuereb qalet li "valutazzjoni speċifika tal-impatt fuq il-gżejjer tagħti lin-negozji ċ-ċertezza li l-investimenti tagħhom fil-gżejjer ikunu mħarsa", u żiedet li dan jgħin lil ekonomiji bħal dik Maltija jiddiversifikaw u ma jibqgħux jiddependu daqshekk fuq it-turiżmu.

Meta tkellmet dwar l-isfidi usa' li ġġib magħha l-insularità, Xuereb qalet:

"L-Arċipelagu Malti jiffaċċja żewġ livelli ta' insularità. Aħna nħallsu aktar biex indaħħlu l-prodotti f'Malta u aktar biex nesportawhom. Dawn l-ispejjeż addizzjonali tat-trasport huma piż fuq in-negozji tagħna u fl-aħħar mill-aħħar jolqtu lill-konsumaturi.

"Il-ħolma Ewropea għaċ-ċittadini Maltin għadha ħajja. Għandna bżonn li l-Ewropa tagħraf dawn ir-realtajiet u tiżgura li l-politiki tagħha jwasslu riżultati konkreti għan-nies li jgħixu fuq il-gżejjer."

Il-Ministru Camilleri saħaq ukoll li l-Istrateġija tal-UE għandha tagħraf iċ-ċirkostanzi partikolari ta' Għawdex, fejn l-insularità doppja toħloq sfidi addizzjonali għall-infrastruttura, il-konnettività u l-attività ekonomika. Huwa appella biex dawn ir-realtajiet ġeografiċi jiġu riflessi b'mod ċar fl-istrateġija.