Il-liġi dwar is-sigurtà tal-fruntieri ta' Roberta Metsola ġiet approvata b'maġġoranza kbira

Ir-Rapport Metsola li jdaħħal liġi tal-UE biex tinħoloq sistema Ewropea ġdida ta '"Dokumenti Foloz u Awtentiċi (FADO)" illum ġie approvat mill-plenarja tal-Parlament Ewropew b'maġġoranza enormi, u allura qabes l-aħħar ostaklu biex din is-sistema issir parti minn liġi Ewropea.

Il-votazzjoni finali saret illum wara xhur ta’ negozjati mmexxija minn Roberta Metsola bejn il-Kunsill tal-Unjoni Ewropea, il-Kummissjoni Ewropea u l-gruppi politiċi kollha fil-Parlament Ewropew.

Il-MPE Roberta Metsola, ir-Rapporteur tal-Parlament dwar din il-liġi l-ġdida, qalet: “Iċ-ċittadini tagħna għandhom dritt għas-sigurtà. Is-sistema l-ġdida FADO li aħna ħloqna, tgħin lill-Istati Membri tal-UE jaqsmu bejniethom b’mod rapidu kopji ta' dokumenti ġenwini, foloz u falsifikati, u dan huwa essenzjali għall-ġlieda kontra l-kriminalità.

L-użu b'qerq ta' dokumenti madwar l-Ewropa żdied b'mod sinifikanti f'dawn l-aħħar snin u huwa essenzjali li nindirizzaw dan il-fenomenu. Il-metodi użati mill-kriminali qed jinbidlu u għandna bżonn nibqgħu dejjem minn tal-anqas pass wieħed quddiem il-kriminali.

Din il-liġi hija importanti ħafna għal Stati bħal Malta. Hija tiżgura l-ħarsien aħjar tal-fruntieri esterni tal-Unjoni, tissalvagwardja l-moviment liberu tan-nies f’Schengen u tiffaċilita l-moviment tan-nies bejn il-fruntieri li jġorru dokumenti validi għall-ivvjaġġar, l-identità u r-residenza. Dan jgħin lill-awtoritajiet tagħna jindunaw b’dokumenti foloz u din il-liġi tagħti lill-awtoritajiet għodda li għandhom bżonn, u li fil-fatt qegħdin jitolbu biex jagħmlu xogħolhom tajjeb.

Wieħed mill-aspetti kruċjali hu li din il-liġi se tipproteġi wkoll id-drittijiet ta' nies li l-identità tagħhom qed tintuża minn netwerks kriminali - anke mingħajr l-għarfien ta’ dawn in-nies innoċenti.

U fl-aħħar nett, din il-liġi tiffinalizza r-riforma tal-Gwardja Ewropea tal-Fruntiera u tal-Kosta. Roberta Metsola kienet ukoll ir-Rapporteur tal-Parlament dwar din il-liġi li rat il-bidu tal-introduzzjoni ta' 10,000 gwardja tal-fruntiera u tal-kosta ġodda li se jkollhom is-setgħa li jiġġieldu l-kriminalità transkonfinali u jittrattaw ma' individwi li ma jkunux eliġibbli li jidħlu fil-fruntieri tal-UE. "