MEP Peter Agius iressaq deroga li tista’ tiffranka lil Malta €60 miljun fis-sena fi spejjeż tat-trasport

Waqt il-Plenarja fi Strasburgu, l-MEP Peter Agius ressaq deroga favur il-gżejjer Ewropej permezz ta’ 86 emenda għal-liġi tal-Iskema tal-Unjoni Ewropea għall-Iskambju ta’ Kwoti tal-Emissjonijiet (ETS), li bħalissa qed timponi taxxa addizzjonali fuq it-trasport bl-ajru u bil-baħar lejn u minn Malta.

“Bħalissa Malta qed tħallas prezz sproporzjonat għat-trasport kollu bil-baħar u bl-ajru minħabba t-taxxa addizzjonali tal-ETS tal-UE, li sfortunatament ma tqisx id-dipendenza totali ta’ gżejjer bħal Malta fuq it-trasport bl-ajru u bil-baħar, u lanqas l-impatt tal-ETS fuq l-għoli tal-ħajja fil-gżejjer. Qed nippreżenta deroga għall-gżejjer bil-għan li jitqiesu l-piżijiet addizzjonali u uniċi li jġorru l-gżejjer, inkluż tnaqqis ta’ 50% fit-taxxa applikabbli tal-ETS għat-trasport kollu bl-ajru u bil-baħar lejn u minn Malta,” qal Agius.

Stqarrijiet reċenti mill-ATTO, l-assoċjazzjoni tal-operaturi tat-trakkijiet u t-trejlers, u mill-Kamra tal-Kummerċ jindikaw li huwa stmat li kull sena jiġu ttrasportati bil-baħar madwar 67,000 kontejner lejn u minn Malta. Skont l-ATTO, it-taxxa tal-ETS tammonta għal €530 għal kull trejler jew kontejner. Dawn huma spejjeż addizzjonali fuq it-tariffi standard tal-merkanzija u tal-fjuwil, li diġà joħolqu piż sinifikanti fuq it-trasport lejn il-gżejjer.

L-impatt tat-taxxa tal-ETS huwa sinifikanti wkoll fuq is-settur tal-avjazzjoni f’Malta, bil-Bank Ċentrali ta’ Malta jirreġistra spiża addizzjonali ta’ €88 miljun fis-sena f’taxxa tal-ETS fuq titjiriet lejn u minn Malta.

L-emendi proposti mill-MEP Agius jipprevedu tnaqqis temporanju ta’ 50% fit-taxxa applikabbli tal-ETS għat-trasport kollu bl-ajru u bil-baħar lejn u mill-gżejjer sal-2040. Il-bidliet proposti minn Dr Agius jinkludu wkoll miżuri li jinkoraġġixxu aktar investiment dirett fit-trasport ekoloġiku fis-settur marittimu, kif ukoll aktar trasparenza dwar l-użu tal-fondi mill-ETS.

“Qed nappella għal deroga parzjali u temporanja ta’ 50% mit-taxxa eżistenti tal-ETS. Dan għaliex il-poplu Malti jrid ikun parti mill-isforz Ewropew fil-ġlieda kontra t-tibdil fil-klima. Irridu nappoġġjaw miżuri biex insalvaw il-pjaneta għall-familji tagħna u għall-ġenerazzjonijiet futuri, iżda dawn l-isforzi jeħtieġ li jkunu proporzjonati fl-impatt tagħhom fuq il-gżejjer. Dawn id-derogi jitneħħew gradwalment bil-għan li nħeġġu lill-operaturi tat-trasport u lill-entitajiet pubbliċi jinvestu b’mod qawwi fit-trasport ekoloġiku minn issa sal-2040. Dan l-approċċ bilanċjat se jippermettili nikseb l-appoġġ ta’ sħabi l-MEPs minn pajjiżi oħra għal ‘Deroga għall-Gżejjer’ li tista’ tiffranka lil Malta €60 miljun fis-sena fi spejjeż li jolqtu l-għoli tal-ħajja,” qal l-MEP.

“Mill-2021 ’l hawn ilni nwissi lill-politiċi f’Malta dwar l-impatt sproporzjonat tal-Patt Ekoloġiku Ewropew fuq il-konsumatur Malti. Sfortunatament, meta ġew adottati r-regoli, Malta ma rnexxilhiex tmexxi ’l quddiem il-każ biex l-ispeċifiċitajiet tal-gżejjer jiġu kkunsidrati fl-ETS. Minn meta ġejt elett bħala MEP, għamilt din il-kwistjoni missjoni tiegħi sabiex nikkoreġu dan l-iżball. L-emendi tiegħi issa qed jiksbu l-appoġġ ta’ diversi MEPs fil-Parlament Ewropew u ninsab fiduċjuż li fil-ġimgħat li ġejjin nistgħu nagħmlu passi ’l quddiem għal Malta,” temm jgħid l-MEP Agius.