Issa jmiss il-politiċi li jridu jiffaċċjaw il-ġustizzja – Casa

Waqt is-sessjoni plenarja tal-Parlament Ewropew fi Strasburgu llum, l-MEP David Casa talab li ssir ġustizzja għal Daphne Caruana Galizia, li nqatlet 5 snin ilu lbieraħ.

“L-assassini nqabdu. Issa jmiss il-politiċi u l-uffiċjali li kellhom sehem fl-assassinju.”

Casa rrikonoxxa l-kundanna ta’ tliet qattiela, iżda qal li dan kien biss il-bidu. Il-veru test għall-ġustizzja ser ikun il-prosekuzzjoni tal-politiċi u uffiċjali kollha li wittew it-triq għall-qtil tagħha u li sussegwentement xekklu l-ġustizzja.

Huwa kkritika wkoll lill-gvern Laburista talli dam ħafna biex jaħdem kontra r-reati ta’ korruzzjoni li kienet qed tinvestiga Daphne Caruana Galizia.

“Għad jonqos ġustizzja sħiħa għal dik il-kriminalità li nqatlet hi u tesponi. U fuq dan il-punt, għadna lura ħafna.”

Casa kien qed jindirizza d-dibattitu bit-titlu “Is-saltna tad-dritt f’Malta, ħames snin wara l-qtil ta’ Daphne Caruana Galizia”. Id-dibattitu ntalab mill-Grupp tal-PPE.

Casa rringrazzja lill-Parlament Ewropew għall-isforzi kontinwi tiegħu f’ġieħ Daphne Caruana Galizia. Il-sala tal-konferenzi tal-aħbarijiet ta’ Strasburgu ngħatat l-isem ta’ Daphne u nhar l-Erbgħa li ġej, il-Parlament se jħabbar ir-rebbieħ tat-tieni edizzjoni tal-Premju Daphne Caruana Galizia għall-Ġurnaliżmu.

"Dan il-premju jonora lil Daphne, iżda jonora wkoll il-prinċipji li għexet u nqatlet għalihom."

Casa spjega li l-ġurnalisti huma f’riskju akbar meta l-awtoritajiet jonqsu milli jieħdu azzjoni fuq il-ħażin li jirrappurtaw. L-impunità tpoġġi lill-ġurnalisti f'riskju: huwa meta l-liġijiet ma jiġux infurzati u l-awtoritajiet jikkonfoffaw mal-kriminali li "ir-riskju għas-sikurezza tal-ġurnalisti huwa l-akbar".

“Sakemm l-istituzzjonijiet f’Malta jibqgħu jżommu mal-kriminalità qabel ma jaqbżu għaċ-ċittadini, qatt m’aħna se nagħlqu dan il-kapitlu iswed fl-istorja tagħna.”

“Daphne kien ħaqqha aħjar. Il-poplu Malti u Għawdxi ħaqqu aħjar. U se nibqgħu nirsistu, b’ħilietna kollha, biex niżguraw ġustizzja sħiħa.”