Il-Parlament Ewropew jappoġġja bil-qawwa l-emendi ta’ Peter Agius biex Malta tikseb aktar fondi mill-Erasmus+

L-emendi għar-Regolament tal-Erasmus+ se jwasslu għal aktar opportunitajiet għaż-żgħażagħ mill-gżejjer bħal Malta u Għawdex, inkluż rimborż sħiħ tal-ispejjeż tal-ivvjaġġar minn u lejn il-gżejjer

Fi Strasburgu, il-Membri tal-Parlament Ewropew ivvutaw b’appoġġ qawwi għall-emendi mressqa mill-MEP Peter Agius, bil-għan li jiftħu aktar opportunitajiet Ewropej għaż-żgħażagħ Maltin u Għawdxin biex jibbenefikaw mill-programm Erasmus+.

“Il-vot favur il-bidliet li tlabt għall-benefiċċju taż-żgħażagħ Maltin, appoġġati minn 454 MEPs mill-gruppi politiċi kollha, huwa xhieda oħra li nistgħu nbiddlu l-Ewropa biex tadatta għall-ħtiġijiet taċ-ċittadini f’Malta u Għawdex. Kulma rridu nagħmlu hu li nippruvaw, b’mod konsistenti u b’insistenza.

“Li tgħix fuq gżira jista’ jkun sabiħ, iżda dan għandu l-ispejjeż tiegħu. Irridu nagħmlu lill-Ewropa konxja ta’ dawn l-ispejjeż u niżguraw li jkun hemm salvagwardji fil-leġiżlazzjoni tal-UE. F’dan il-każ, irridu niftħu aktar opportunitajiet tal-Erasmus+ għaż-żgħażagħ fil-gżejjer biex jagħmlu tajjeb għall-iżvantaġġi tal-insularità u niżguraw li l-ivvjaġġar lejn il-gżejjer ma jiġix penalizzat permezz tal-limiti fuq il-prezzijiet marbuta mal-Patt Ekoloġiku Ewropew.”

Il-programm Erasmus+ illum jinkludi mhux biss il-perjodi magħrufa ta’ studju barra mill-pajjiż, li jdumu bejn tlieta u ħames xhur fil-livell universitarju, iżda wkoll żjarat edukattivi fi gruppi u skambji mfassla apposta għal gruppi żgħar fis-setturi tal-isport, tal-kultura u tal-edukazzjoni.

Importanti wkoll li l-programm jinkludi vawċers għal ivvjaġġar b’xejn mill-programm DiscoverEU għaż-żgħażagħ ta’ 18-il sena, kif ukoll l-inizjattiva tal-Korp Ewropew ta’ Solidarjetà, li tippermetti lill-NGOs u lill-organizzazzjonijiet tas-soċjetà ċivili jipprovdu jew jitolbu assistenza f’sitwazzjonijiet ta’ emerġenza fil-livell nazzjonali jew jinvolvu ruħhom f’inizjattivi ta’ ħidma fil-komunità.

Il-pożizzjoni tal-Parlament Ewropew dwar ir-Regolament il-ġdid tal-Erasmus+ issa tinkludi l-proposti ta’ Agius għal Malta. Dawn jirrikonoxxu l-insularità bħala ostaklu għall-mobbiltà tal-istudenti u jitolbu aktar riżorsi għall-istudenti mill-gżejjer.

Ir-Regolament propost jinkludi wkoll formulazzjoni li għandha tiżgura r-rimborż sħiħ tal-ispejjeż tal-ivvjaġġar għall-istudenti mill-gżejjer, b’referenza għall-“ispejjeż addizzjonali tal-ivvjaġġar għar-reġjuni insulari”.

L-emendi ta’ Agius għandhom l-għan li jneħħu l-limiti inġusti fuq l-ispejjeż tal-ivvjaġġar għal dawk li jivvjaġġaw minn u lejn il-gżejjer. L-inizjattiva tal-MEP Agius ġiet wara lmenti minn diversi parteċipanti Maltin fil-programm Erasmus+ li l-programm kien ikopri biss parti mill-ispejjeż tagħhom minħabba n-nuqqas ta’ għażliet ta’ “ivvjaġġar ekoloġiku”, li jiffavorixxu konnessjonijiet bil-ferrovija u bil-karozza tal-linja, li mhumiex disponibbli għall-ivvjaġġar minn u lejn Malta.

“Qed nibdlu liġi importanti tal-UE biex niftħu aktar opportunitajiet għaż-żgħażagħ Maltin. Dan qed nagħmluh wara li kkuntattjawni parteċipanti Maltin fl-Erasmus+ li lmentaw dwar il-limiti fuq l-ispejjeż u n-numru ta’ opportunitajiet disponibbli.

“Aġixxejt biex nindirizza l-ħtiġijiet tagħhom fil-mument opportun. Dan jurina li l-Ewropa mhijiex entità statika li nistgħu sempliċement nilmentaw dwarha, iżda proġett dinamiku li jista’ jinbidel biex jadatta għall-ħtiġijiet tagħna meta naġixxu biex dan iseħħ.

“Issa nappella lill-gvernijiet kollha biex jappoġġjaw il-pożizzjoni tal-Parlament Ewropew ħalli l-programm il-ġdid Erasmus+ jidħol fis-seħħ sa mill-2028,” temm jgħid Dr Agius.