Peter Agius jitlob tweġibiet dwar il-Malti ħażin fit-testijiet tar-reklutaġġ tal-UE

18.11.2026 11:21

Peter Agius jitlob tweġibiet dwar il-Malti ħażin fit-testijiet tar-reklutaġġ tal-UE

Avviż importanti

Il-pożizzjonijiet hawnhekk huma tad-delegazzjoni nazzjonali u mhux bilfors dejjem jirriflettu l-pożizzjoni tal-Grupp.

Peter Agius
Traduzzjoni
Agħżel lingwa oħra:

L-MEP jitlob investigazzjoni u salvagwardji aktar b’saħħithom biex jiġi żgurat trattament ugwali għall-kandidati Maltin

Il-kandidati Maltin li japplikaw biex jaħdmu fl-istituzzjonijiet tal-UE għandhom ikunu jistgħu jikkompetu fuq l-istess livell ma’ kandidati minn kull Stat Membru ieħor, qal l-MEP Peter Agius, wara li qajjem tħassib dwar il-kwalità tal-Malti użat f’testijiet riċenti tal-Uffiċċju Ewropew għas-Selezzjoni tal-Persunal (EPSO).

F’mistoqsija bil-miktub lill-Kummissjoni Ewropea, Agius qed jitlob tweġibiet wara rapporti minn kandidati Maltin dwar żbalji grammatikali u sintattiċi serji, kif ukoll formulazzjonijiet mhux naturali, fil-mistoqsijiet tat-testijiet bil-Malti.

Nuqqasijiet bħal dawn jistgħu joħolqu konfużjoni fost il-kandidati u jdgħajfu l-ġustizzja u l-affidabbiltà tal-proċess ta’ reklutaġġ tal-UE.

“Il-kandidati Maltin m’għandhomx jitqiegħdu fi żvantaġġ minħabba l-kwalità tal-lingwa użata f’test tar-reklutaġġ tal-UE. Dawn l-eżamijiet ikunu tellieqa kontra l-ħin. Ma nistax naċċetta li kandidati Maltin jitilfu l-ħin minħabba Malti ħażin. Kulħadd jistħoqqlu opportunità ġusta biex juri l-kapaċitajiet tiegħu, mingħajr ma jkollu joqgħod jipprova jifhem mistoqsijiet ifformulati ħażin,” qal Agius.

L-MEP qed jitlob lill-Kummissjoni tiċċara jekk tintużax l-intelliġenza artifiċjali biex jiġu tradotti jew prodotti testijiet tal-EPSO mill-Ingliż għall-Malti, u liema proċeduri ta’ traduzzjoni, qari tal-provi u kontroll tal-kwalità huma fis-seħħ qabel ma jsiru t-testijiet.

Qed jitlob ukoll investigazzjoni dwar il-problemi rrappurtati, rieżami tat-testijiet affettwati fejn ikun meħtieġ, u garanzija li t-testijiet futuri bil-Malti jiġu riveduti minn esperti kwalifikati fil-lingwa Maltija qabel ma jsiru mill-kandidati.

“Din hija kwistjoni ta’ trattament ugwali u ta’ fiduċja fis-sistema ta’ reklutaġġ tal-UE. Il-kandidati għandhom jiġu evalwati fuq il-kapaċitajiet tagħhom, u mhux jitqiegħdu fi żvantaġġ minħabba żbalji lingwistiċi. Il-Kummissjoni għandha tistabbilixxi x’mar ħażin u tiżgura li jkun hemm is-salvagwardji xierqa fis-seħħ,” żied jgħid Agius.

Il-Malti huwa lingwa uffiċjali tal-Unjoni Ewropea. Agius isostni li l-użu korrett u professjonali tiegħu fil-proċeduri ta’ reklutaġġ huwa essenzjali biex jiġu żgurati opportunitajiet indaqs u tinżamm il-fiduċja fl-istituzzjonijiet tal-UE.

Nota lill-edituri

Il-Grupp tal-PPE huwa l-akbar grupp politiku fil-Parlament Ewropew b'185 Membru mill-Istati Membri kollha.

Kontenut relatat