David Casa jappella għal infurzar aktar b’saħħtu biex jiġu mħarsa r-residenti, il-wirt u l-postijiet ta’ qima fil-Belt Valletta

Il-Kap tad-Delegazzjoni tal-Partit Nazzjonalista fil-Parlament Ewropew, David Casa, kiteb lill-Kummissarju tal-Pulizija fejn ħeġġu jsaħħaħ l-infurzar fil-Belt Valletta, b’mod partikolari madwar il-knejjes u siti oħra ta’ importanza storika, kulturali u reliġjuża.

Dan l-appell sar wara t-tħassib li rċieva Casa mingħand residenti u membri tal-pubbliku dwar id-deterjorament kontinwu tal-ordni pubbliku fil-kapitali. Filwaqt li inċidenti riċenti reġgħu xeħtu l-attenzjoni fuq dawn il-problemi, Casa saħaq li s-sitwazzjoni fil-Belt ilha sejra lura għal ħafna snin u teħtieġ rispons sostnut.

“Ir-residenti għandhom kull dritt jistennew li l-liġijiet li jgħaddi l-Parlament jiġu infurzati b’mod konsistenti. Għal ħafna żmien, ħafna ħassew li partijiet mill-Belt tħallew jiddeterjoraw, b’imġiba inaċċettabbli ssir dejjem aktar normalizzata għad-detriment tar-residenti, tal-wirt tagħna u tad-dinjità tal-kapitali tagħna,” qal Casa.

Huwa nnota li għandha tingħata attenzjoni partikolari biex jiġu mħarsa ż-żoni sensittivi madwar il-knejjes, fosthom il-Knisja ta’ Ġieżu, kif ukoll postijiet oħra ta’ qima.

“Il-Belt Valletta hija l-kapitali ta’ Malta u Sit ta’ Wirt Dinji tal-UNESCO. Tixirqilha preżenza viżibbli u konsistenti tal-pulizija li tħares l-ordni pubbliku, tipproteġi l-wirt tagħna, tirrispetta l-benesseri u l-kwalità tal-ħajja tar-residenti tagħha, u tiżgura li l-postijiet ta’ qima jingħataw ir-rispett li jixirqilhom,” żied Casa.

Fl-ittra tiegħu, Casa ħeġġeġ lill-Korp tal-Pulizija jsaħħaħ il-preżenza tiegħu fil-Belt Valletta u jiżgura li l-liġi tiġi applikata b’mod konsistenti.

“Id-deterjorazzjoni gradwali ta’ partijiet mill-Belt la hi inevitabbli u lanqas mhi aċċettabbli. Wasal iż-żmien li nerġgħu nuru rispett lejn il-kapitali tagħna, dawk li jgħixu fiha, u l-postijiet li jiffurmaw parti integrali mill-identità nazzjonali tagħna,” temm jgħid Casa.