Il-European Disability Card ssir realtà wara vot deċiżiv tal-Parlament - MEP DAVID CASA

L-MEP David Casa faħħar l-appoġġ qawwi għall-Karta Ewropea tad-Diżabilità wara li maġġoranza kbira tal-MPE appoġġjaw l-introduzzjoni tagħha fl-UE kollha.

“Għadna kif bgħatna sinjal qawwi favur Ewropa aktar inklużiva,” iddikjara Casa bħala n-negozjatur tal-PPE dwar id-Direttiva rilevanti.

Casa sostna li waħda mil-libertajiet fundamentali tal-Unjoni Ewropea hija il-moviment ħieles tan-nies, u għalhekk kien sewwa li l-persuni b’diżabilità jgawdu l-istess aċċess bħaċ-ċittadini l-oħra kollha.

“Il-Karta tad-Diżabilità se tkun prova legali tal-istatus ta’ diżabilità u se tiftaħ aċċess essenzjali għal dawk kollha b’diżabilità li jivvjaġġaw madwar l-Unjoni Ewropea,” spjega Casa. “Hu pass importanti ħafna li se jagħti benefiċċji konkreti pożittivi liċ-ċittadini u li jsaħħaħ id-drittijiet ta’ miljuni ta’ ċittadini tal-UE.

"Hija kisba li għandna nkunu kburin biha," sostna Casa. "Dawn mhumiex drittijiet ġodda, iżda drittijiet li ġew imċaħħda għal snin sħaħ u li fl-aħħar għandna soluzzjoni ġusta."

Waqt li kien qed jindirizza s-sessjoni plenarja qabel il-vot, l-MPE David Casa qal li l-ħidma fuq id-drittijiet tad-diżabilità kienet għadha qed tibda.

“Jeħtieġ li niżguraw li d-drittijiet tal-persuni b’diżabilità fl-Istati Membri jkunu aktar b’saħħithom milli huma issa. Għad fadlilna ħafna x’naqdfu.”

Il-vot finali dwar id-Direttiva l-ġdida ttieħed matul l-aħħar sessjoni plenarja tad-9 leġiżlatura. Issa se jiġi ffirmat fil-liġi u se jkollu jiġi traspost mill-Istati Membri minn hemm 'il quddiem.

Sfond

L-MEP David Casa kien in-negozjatur tal-PPE dwar id-Direttiva li tistabbilixxi l-Karta Ewropea tad-Diżabilità u l-Karta Ewropea tal-Parkeġġ. Il-Karta Ewropea tad-Diżabilità se sservi bħala prova tal-istatus tad-diżabilità madwar l-Unjoni Ewropea. Din se tinħareġ mingħajr ħlas u se tintitola lid-detenturi tal-karti Maltin għall-istess drittijiet u benefiċċji bħall-persuni b’diżabilità li huma residenti fil-pajjiż tal-UE li jkunu qed iżuru. Il-Karta Ewropea tal-Parkeġġ hija l-kontroparti tagħha għall-parkeġġ aċċessibbli.