Peter Agius jindirizza laqgħa tal-grupp tal-PPE fi Brussell: L-Ewropa trid turi appoġġ konkret lill-Maltin ta' rieda tajba hekk kif il-Gvern ifittex li jimblokka l-inkjesti tal-Maġistrat fuq politiċi korrotti, li jkompli jnaqqas il-kredenzjali demokratiċi

Illum fi Brussell, l-MEP Peter Agius indirizza l-laqgħa tal-grupp tal-PPE b'sejħa lill-Ewropa biex tgħaddi mill-kliem għall-azzjoni dwar l-istat tad-dritt quddiem is-sejħa tal-Gvern biex jimblokka l-inkjesti tal-Maġistrat fuq politiċi korrotti permezz tal-abbozz ta' liġi ppreżentat fil-Parlament din il-ġimgħa.

'Grazzi għall-kuraġġ ta' Simon Busuttil u David Casa, issa għandna investigazzjoni kriminali fuq dawk wara 17 Black u l-Electrogas. Dan jibgħat messaġġ ta' tama lill-Maltin kollha ta' rieda tajba, iżda mhux lil Robert Abela. Il-Gvern Laburista jrid jiskoraġġixxi l-ġustizzja, irid jimblokka l-inkjesti tal-Maġistrat, billi jneħħi l-uniku għodda għan-nies biex jaraw li l-liġi ma twaqqaf l-abbuż tal-poter,' qal l-MEP Peter Agius fl-indirizz tiegħu lil-Mexxej tal-PPE Manfred Weber u l-MEPs minn madwar l-Ewropa kollha li ltaqgħu għall-ewwel darba din is-sena fil-laqgħa tal-Grupp tal-PPE fi Brussell.

'Il-partit tiegħi f'Malta qed jiġġieled bl-unuri kollha biex jiddefendi l-libertajiet Maltin u Ewropej, biex jiddefendi l-flus ta’ dawk li qedin iħalsu t-taxxa, biex jiddefendi d-demokrazija tagħna. Se nkunu qed nitolbu l-appoġġ kontinwu tagħkom biex niżguraw li Robert Abela ma jaqbiżx l-istandards tal-istat tad-dritt permezz ta’ din it tip ta’ politika tiegħu fl-Ewropa. Il-PPE se jerġa' jżomm sod ma' Malta u l-Maltin għax nemmnu li l-ebda politiku korrott m'għandu jaħrab mingħajr konsegwenzi bil-flus tat-taxxi tagħna kif qed jagħmlu bil-kuntratti ta' 400 miljun tal-Vitals u l-Electrogas,' ikkonkluda l-MEP Peter Agius.