Il-kultura ta' impunità f'Malta għadha hemm - David Casa

Jeħtieġ li jsir ħafna aktar biex il-kultura ta' impunità f'Malta tinqered, qal David Casa waqt li kien qed jindirizza lill-Parlament Ewropew nhar it-Tlieta.

Waqt li introduċa dibattitu dwar ir-rigress tal-istat tad-dritt f’Malta, fl-okkażjoni tat-tmien anniversarju tal-qtil ta’ Daphne Caruana Galizia, Casa, li jmexxi d-delegazzjoni ta’ Malta fil-PPE qal li għalkemm saru bidliet bis-saħħa tal-pressjoni tal-PE, fadal ħafna xi jsir.
“Huwa skorrett li ngħidu li ma kienx hemm kambjamenti. Il-kriminali ta’ livell baxx li wettqu l-assassinju ġew kundannati l-ħabs. Il-mod ta’ kif tinħatar il-ġudikatura nbidel. U daħlu fis-seħħ liġijiet Ewropej li jipproteġu l-ġurnalisti.”

Madankollu, għad ma kien hemm l-ebda riżultat fil-każ kontra l-allegat mandat, u r-rakkomandazzjonijiet ta' inkjesta pubblika, mitluba ripetutament minn dan il-Parlament, għad iridu jiġu implimentati.

“L-ewwel fosthom hija li dak kollu li kellu jinbidel biex negħlbu l-klima ta’ impunità għadu ma nbidilx...

“Ġustizzja għal Daphne tfisser ġustizzja għall-kriminalità li ġiet maqtula biex iwaqqfuha milli tesponi.

“Imma 8 snin wara l-assassinju għad m’hemmx kundanna waħda li hi waħda fuq dik il-korruzzjoni kollha.

Casa kompla li Malta għadha ma tgħallmitx tant li l-ġimgħa l-oħra, fl-anniversarju tal-assassinju, impjegat mill-uffiċċju tal-Prim Ministru mar jarmi l-fjuri li tħallew biex ifakkru lil Daphne fuq il-mafkar tagħha. Waqt li ambaxxatti ikkundannaw dan l-att, il- Prim Ministru m’għamilx l-istess.

Filwaqt li kkundanna l-attakk fuq il-ġurnalist Taljan Sigfrido Ranucci l-ġimgħa l-oħra fl-istess jum tal-anniversarju tal-assassinju ta’ Daphne, Casa qal li dan, kif ukoll il-massakru f’Gaża, kienu prova li l-ġurnalisti għadhom mheddha mad-dinja kollha. 

“Jeħtieġ li nitgħallmu mill-passat. U nappella biex qatt u qatt ma niddeffendu l-indifensibbli,” temm jgħid Casa.